منتدى الأشــــــــــــــراف
اهلا وسهلا بك عزيزي الزائر
يسعدنا ان تنضم لمنتديات الاشـــــــــــــــــــــراف
ولكم جزيل الشكر والتقدير..
ادارة المنتدى


منتدى الاشراف
 
الرئيسيةس .و .جبحـثالأعضاءالتسجيلدخولدردشة
دخول
اسم العضو:
كلمة السر:
ادخلني بشكل آلي عند زيارتي مرة اخرى: 
:: لقد نسيت كلمة السر
المواضيع الأخيرة
» فلسطين عاصمتها القدس
الجمعة ديسمبر 08, 2017 1:06 pm من طرف احمد

» العائلات التي تنتسب الى القطب عبد القادر الجيلاني في الاردن و فلسطين
الثلاثاء يوليو 22, 2014 10:36 pm من طرف احمد

» وادي الذئاب الجزء الثامن الحلقه 54
الإثنين أبريل 21, 2014 8:27 pm من طرف احمد

» تردد قنوات ناقله لكأس العالم ودوري ابطال اوروبا zdf الالمانيه
الإثنين أبريل 21, 2014 8:21 pm من طرف احمد

» اهلا بالاعضاء
الجمعة نوفمبر 15, 2013 6:01 pm من طرف احمد

» مسلسل وادي الذئاب الجزء السابع7 والثامن 8 مراد علم دار ومقتل ميماتي نقلا عن قناة وتلفزرون الفجر
السبت يونيو 15, 2013 5:54 pm من طرف احمد

» جامعة اجدابيا على الفيس بوك Facebook
السبت ديسمبر 15, 2012 4:07 pm من طرف سراج

» تزوير لنسب ( البلاصي وال أبو محفوظ
الثلاثاء ديسمبر 04, 2012 4:38 pm من طرف بنت المغرب

» عد من 1 الى 5 واهدي قلبك للعضو الي تحبه
السبت أكتوبر 20, 2012 6:14 pm من طرف ميسي

» بنت الصحراء
الأربعاء أبريل 25, 2012 10:34 am من طرف احمد

انت الزائر رقم

.: لاتجعلها أخر زيارة :.

نتيجة المنتدى
معليش سجل معانا الاول
محرك بحث المنتدى

شاطر | 
 

 ياتركي جفت دمعت العين لرضاك . لاتفوتكم

اذهب الى الأسفل 
كاتب الموضوعرسالة
احلام بنوته

avatar

عدد المساهمات : 219
تاريخ التسجيل : 17/08/2009

مُساهمةموضوع: ياتركي جفت دمعت العين لرضاك . لاتفوتكم   الأحد سبتمبر 27, 2009 9:52 pm

ياتركي جفت دمعت العين لرضاك ..
قصة حقيقيه لصديقان من القصيم ..


------------------------------------------------------





_ ت ت تركي
# وليد تركي فيه شي
_ لابس تركي مسافر
# وشلون مسافر وسيارته فيه
_مسافر بالطياره
#ليه ماقالي
_ طلع فهد اخو تركي الكبير
_ هلا والله بسالم منور البيت تفظل
# فهد تركي وينه _
_مايصير نتكلم عند الباب تفظل
# دخلت وال شي شفته سيكل صغير بزاوية الحوش ..
تذكرت ذاك اليوم ..
(_شوف انادوره وانت دوره
#خلاص بس احلف ماتدعس وتجحدني
_ والله مااجحدك بس دفني وادفك)
كان تركي ينقهر مني لاني اسرع منه ..
دخلنا المجلس وقبل مااجلس
# فهد يرحم والديك تركي وش فيه
_ مافيه الاالخير ان شاء الله اجلس وانااقولك كل شي صار
# قول انااسمعك
_ قبل اسبوعين مرض تركي فجأه ودخل بغيبوبه والحمدلله صحا منها قبل يومين والحين حالت احسن بكثير لكنه مايتكلم
# والحين وينه
_ في غرفته
#ابي اشوفه
_ بس
# قلتلك ابي اشوفه
_ زين تعال معي
(دخلت غرفت تركي وخنقتني العبره ووقفت كل نبضات قلبي كان ممدد فوق السرير والاجهزه
حوله وواقف جنبه دكتور ماسك يده ويناظر الساعه قربت منه وجلست على سريره ومسحت بيدي جبهته )
#تركي.... تركي.. اناسالم رد علي وش فيك حاس بشي يعورك شي رد علي يالغالي حطيت راسي على صدره ونفجر بديت اصيح حسيت اني طفل صغير
# تركي رد علي ليه سويت كذا ليه ياتركي اناوش سوت عشان تبعد قولي ياتركي له (رفعت راسي اكلم فهد ...
#ليه ماقلتولي ليه اناسالم انااخوه اناصديقه انااغلا انسان عنده
(نزل فهد راسه )
# رد علي ليه ماقلتولي هو محتاجني الحين
_ ب ب بس هو طلب مني مااقولك
# (تغيرت نبرت صوتي) ... ليه
_ماادري بس قالي لو تدهورت حالتي لايدري سالم ماابيه يتضايق وبعده بيوم دخل بغيبوبه
(ماتبي اتضايق ياتركي انت ذبحتني ماضايقتني)
جلست عند تركي وكنت انتظره يصحى في بالي اسئله كثير ودي اسأله .. ليه تغير مره وحده كذا ؟
ليه ماقالي وش الخطا الي سويته ليه راح وتركني بحيرتي
راحت ثلاث ساعات وانا جالس بجنبه واتامل وجهه واضح انه تعبان كان العرق ينزل من جبهته ويتنفس بصعوبه واناجالس جنبه ومابيدي حل ..
اصحى ياتركي تعب وانا انتظرهاليوم ريحني والله تعبت ..
سمعت تركي ينطق كلمات غريبه عجزت اجمعها مع بعض كان صوته ثقيل والتعب غالب عليه ..
كان يقول : لا انت تكذب ناصر قول قول هم يكذبون ..
حاولت اصحيه
# تركي تركي
( لكن مارد علي)
بعد ساعه تقريبا فتح تركي عيونه وكنت جنبه
#تركي الحمدلله على سلامتك
اول ماشافني عصب وتغيرت نظراته لي انت وش تسوي هنا
انصدمت من ردت فعله انا انا ..
# تركي اناسالم صديقك
_هذاك اول اتركني الحين اطلع من حياتي ابي انساك
(كان تعبان ويتكلم بصعوبه خفت عليه ومافكرت بكلامه )
# خلاص ياتركي لاتتكلم انت تعبان تكفى ارتاح
دخل فهد ووليد وكان الدكتور معهم
_ ابعدوه عني ماابي اشوفه
شالوني فهد ووليد من عنده وماحاولت اعترض او اقاوم كنت اناظره لحد ماوصلت الباب
سكر وليد الباب
_ ماادري وش اقولك ياسالم بس
كنت منصدم من تركي مشيت وتركت فهد وهو يتكلم طلعت من بيتهم ووانامحتار وش صار ماتوقت اشوف
تركي بهالحاله واسمه منه هالكلام
ضاقت بي الدنيا ماادري وين اروح سمعت اذان الفجر رحت للمسجد وصليت جماعه وسحبت مصحف من بين الرفوف
وقريت كم سوره وسكرت القراءن ..
رجعت للبيت وكان شكلي فعلا يخوف كان شماغي على كتفي وازارير ثوبي كلها مفتوحه لقيت امي جالسه تتظرني بالحوش ماقدرة تنام وانا مارجعت ..
_سالم وينك ياوليدي تأخرت
# اسف يمه نسيت اقولك
_وشفيك متضارب مع احد
# لايمه بس تعبان
_ ياوليدي حرام عليك احرقت قلبي قولي وشفيك هالايام
# مافيني شي بس جهزيلي شنطتي بكرى ابروح لمكه اعتمر
_ بتروح لحالك
# ايه
_وتركي
# لاتركي مسافر مع اهله ...
حجزت مع النقل الجماعي كان ودي اروح لمكه واجلس مع نفسي شوي يمكن افهم الي صار كنت طول الطريق افكر بحالة تركي اخاف انه تعب زياده وادعي لله
انه يشفيه ..
وصلنا الميقات واول مانزلت تذكرت يوم جينا اناوتركي قبل سنتين ..
#هاهاها وشفيك تمشي كذا
_ سالم ضف وجهك تراها واصله معي
# الله يقطع بليسك
_ ماابي اعتمر خلاص هونت
# ليه
_ يااخي افهم ماتعودت امشي بدون سروال
# كانوا كل الي يسمعونه يضحكون عليه
لبست حرامي وصليت ركعتين ونويت العمره وصلت مكه الساعه 3 م وسكنت في شركة مكه تبع النقل وكنت تعبان لكن عندي رغبه
كبيره اني اروح للحرم اول مانزلت من الشركه كان قدامي باب الملك عبدالعزيز دخلت للحرم كانت اجواء روحنيه ماتوصف طفت وسعيت طلع من باب
الصفا ورحت لصالون حلاقه كان تحت اسواق الليل
( تذكر يوم رحنا انا وتركي وحلقه الهندي صفر كان شكله يضحك )
بعد ماخلصت اذن الفجر
رجعت للحرم وصليت وكان الامام الشيخ سعود الشريم كانت تلاوته رائعه خشعت معه حسي اني نسيت روحي رجعت للشقه وانسدحت بنام ..
انعادت كل احداث امس قدام عيني حالت تركي ونظرته لي ونبرت الغضب بصوته كل ماتذكرت هالاشياءتجمعت الدموع بعيني كان ودي اعرف
حالته الحين تحسنت اولا لكن كرامتي وكبريائي يمنعوني ادق عليه واسأله ,,
حسيت ان الجوع بيذبحني نزلت للمطعم وطلبت وجبه وجلست على الطاوله وكنت اقراء رساله قديمه من تركي ..
ان كنت ادور يا حياتي على ارضاك
وازعـل اللـي يالغـلا يزعلـونـك
وان كنت احب ومقدر احب لـولاك
وشلون اخونك لعنبـو مـن يخونـك
عذبت روحي يا منى الـروح ويـاك
وحبيت من حبـك حبيبـي طعونـك
________________


---------------------------------------------------------

تنفست بعمق وحسيت بألم كبير في صدري رفعت راسي وشفت واحد موغريب كان يصد عني عرفته كان ناصر تذكرت كلام تركي
(لا انت تكذب ناصر قول قول هم يكذبون )
ماكان تركي يعرف احد اسمه بهالاسم غير ناصر
قمت وسلمت عليه
# هلاناصركيف الحال
_ هلاااا سالم تسرك الحال وش اخبارك انت والاهل ان شاء الله بخير
# الحمدلله كلهم بخير اشوفك لحالك مع مين جاي
_ والله جيت مع الوالد بيعتمر ونرجع للقصيم وانت جاي لحالك
#ايه جيت مع النقل اسبوع واناراجع ان شاء الله
_ غريبه وتركي وينه موعوايدكم تروحون مكان الامع بعض
# لاتركي تعبان شوي
_لالاسلامات مايشوف شر
# الشر مايجيك يارب تفضل تعشى معي
_ الله يزيد فضلك بس الوالد ينتظرني ومااقدر اتاخر عليه اخاف يحتاجني
# على راحتك خلنا نشوفك مع السلامه
_ الله يسلمك
راح ثلاث ايام وانابمكه كنت احس بالملل لوكان تركي معي كان كل شي غير آآآآآآه ياتركي وش هالحيره اللي رميتها في قلبي ..
الساعه 2م دق الجرس واستغربت مين جاي في هالوقت وش يبغي فتحت الباب و انصدمت ......كان ناصر
# هلا ناصر تفضل حياك الله
_ الله يحيك
# عسى ماشر فيه شي الوالد صايرله شي
_ لاالحمد لله كلنا بخيربس مليت وانا لحالي قلت اجي اسهرعندك
# هذي الساعه المباركه
_ الله يبارك بايامك بصراحه ياسالم امس دقيت على تركي خفت لايكون فيه شي وان مخبي علي
# دقيت عليه
_ايه
# وش اخباره تعبان
_ لاالحمدلله كان مبسوط ويضحك
(تضحك ياتركي وانااحترق من سببك ليه بس المهم انك مرتاح اخيرا تطمنت عليك يالغالي ) ........
رجعت للقصيم وراح تقريبا اسبوع كامل وانا مااعرف عن تركي اي خبر ماكنت اطلع من البيت الاللمسجد نزل وزني وصرت جلد وعظم ماكنت ارتاح في نومي
كنت اسهر الليل وانااتذكر الايام اللي راحت وانا مع تركي وافكر وش غيره ؟
تركي عقله كبير وفاهم كل شي معقوله سامع كلام عني او احد قايله شي لامااتوقع مستحيل يصدق ..
كنت مستغرب من ناصر اللي يوم بعد يوم تكثر زياراته لي انا ماكنت اهضمه لان تركي كان يكرهه وانا تعود اللي تركي يكرهه انا اكرهه
كان بعض الاحيان يخطي على تركي لاكني مااسكتله ,,
في يوم من لايام كنت نايم وحلمت اني في صحراء كبيره وجاني شخص وعطاني كاس فاضي وجاني تركي واخذالكاس مني قطع حلمي امي اللي
صحتني
_سالم ياوليدي قوم فيه رجال يبيك بالمجلس
# ان شاء الله يمه
_ كنت اقول في خاطري اكيد ناصر هذا مايستحي بكل ساعه جاي غسلت
وجهي ولبست ونزت دخلت المجلس ...............
انصدمت وقفت بوسط الباب وحسيت برعشه في جسمي حست ان كل اطرافي قاسيه ماقدرت
احرك يديني او انطق حرف واحد كانت عيني على هالشخص اللي جالس في صدر المجلس معقوله انا احلم اكيد لا ..........
كان !!! تــ ـــــ تـــ تركي ...
وقف وكان يناظرني راحت خمس دقايق وحناواقفين وكل واحد يناظر الثاني ...
قرب مني .... وكنت خايف على الرغم من ثباتي
كان تعبان وضاعف مره ووجه شاحب كلناعشنا العذاب نفسه لكني مااعرف السبب ...
كنت اتمنى اشوفه واتكلم معه واسأله عن اللي صار لكن الحين تمنيت الارض ينشق وتبلعني
......................
.........
.....
....
..
ماتوقعت اني اشوف تركي بعد اللي صار وفي مجلس بيتنا بعد كنت موقن بأن علاقتي معه انتهت وللأبد ..
حضني بقوه حسيت ان الدم وقف بعروقي كان يتكلم وهو يصيح
_سالم والله العظيم انا اسف سامحني يالغالي ..
كنت واقف وماحركت ساكن معقوله هذا تركي معقوله يصيح وين كبريائه وشصار وتغير كل شي فينا ..
بعد عني ومسح دموعه ..
_ سالم انا اخطيت في حقك وجرحتك وعيشتك بحيره وصدمتك باعز صديق عندك لكن والله هم السبب .. مبعدت عنه وجلست
#تركي انا ماابي دموع ولااعتذار اللي ابيه شي واحد بس انا وش سويت ..؟!
_ انا راح اقولك كل شي بس تسامحني ..
تذكر ناصر اللي كان يطلع معنا بالاستراحه جاني مره وهومتضايق وكان واضح ان عنده كلام وده يقوله
_ ناصر وش فيك
- والله ياتركي ماادري وش اقولك
_ قول وش فيك لاتخوفني
- انت عارف صديقك سالم وين كان امس
_ ايه كان طالع للإستراحه مع ربع ابوه
- هذا اللي كنت متوقعه
_ انت وش تتكلم عنه
- بصراحه ياتركي سالم كان طالع للبر معنا وكان جالس يتكلم عنك
_ لاسالم مستحيل يسويها انت تكذب
- اناعارف انك بتكذبني لكن هذااللي صار
كان يقول عنك انك انسان غبي وهويمشي معك على شان تصرف عليه بس
_ اقول اسكت وقوم ضف وجهك عني يال****
- لاتتعدا حدودك اناطالع بدون طرد لكن قبل مااطلع ودي تسمع شي - طلع جواله من جيبه ودق على واحد من الشباب كان متفق معه وفتح السبيكر
- الو فهد كيف حالك
_تمام اخبارك انت يانصور
- الحمدلله بس ابي اسالك عن رايك في كلام سالم امس معقوله تركي ماحس فيه
_ لااكيد ماحس سالم هذا حيه واللي يقرصه يموت
وقطع الخط سمعت ياتركي هذا سالم صديقك اللي الحين طردتني على شانه مع السلامه .. وبعدها دقيت انت علي
#الوآ
_ نعم
# هلا تركي وينك مختفي اليوم
_ عندي شغل ولازم اخلصه
# على راحتك يالغالي إذا احتجت اي مساعده اناموجود
_ لا مشكور مع السلامه ( وقطعت الخط وبعد ثواني دقيت على وكنت منصدم من كلام ناصر وعجزت اتكلم)
#الوا تركي ابي اشوفك الحين الوآ الوآ تركي رد علي وشفيك ساكت ( وقطعت الخط) _
بعد اسبوعين دق علي ناصر وقالي انك سافرت للإمارات وهذا اللي اكدلي كلامه تعبت من التفكير بكلامهم ووصيت اخوي فهد
مايقولك اي شي عني على شان ماتتضايق وانت مسافر كنت حاس بشعور غريب في قلبي يكذب كلامهم
دخلت بغيبوبه لمدة اسبوعين وبعدها صحيت وسالت عنك
وقالي فهد انك مسافر كان خايف يقولي انك ماجيتني تعبت زياده كنت احسبك مسافر ولاهمك اذا انا بخير اولا لحد ماجاء ذاك اليوم
اللي صحيت وانت جالس عندي .. وبعد كم يوم شفت ولد عمي واللي كان دكتور في المستشفى وقالي انك دخلت المستشفى في نفس الوقت
اللي كنت احسبك مسافر واكتشفت ان هالحقير ناصر كان يكذب علي جيت لبيتك وسألت امك عنك وقالتلي انك تعبان و رحت لمكه ترتاح شوي
حجزت باول رحله بمكه وماخليت فندق الاوسألت فيه عنك لحد مالقيت اسمك لكن للأسف قالولي انك تركت الشقه ..
ورجعت امس وكنت انتظر اذان الظهر على شان اجيلك هذ كل اللي صار ياسالم وبعدها نزل تركي راسه وهو يصيح
( تجمعت الدموع بعيني وحست اني توي افهم اللي صار انفجرت بالصياح وقمت ورفعت تركي من ثوبه )
# حرام عليك ياتركي تصدق كلام الناس مافكرت بالعشره اللي بيننا انت اكثرواحد
عارف طبعي وشلون اسامحك انت عيشتني بعذاب ماكان يعلم فيه الاالله
( كان صوتي يعلى شوي شوي )
#



-------------------------------------------------------------------





# معقوله انا اطمع بفلوسك موانت اللي علمتني ان الرجال بمعادنهم مو بجيوبهم قول تكلم تكلم
(رد علي تركي بصوت اليم تمنيت اني ماسمعته)
_ ايه ياسالم ...وسكت شوي... اناللي علمتك واناللي علمتك بعد ماتصدق كلام الناس لكني اسف سامحني
# اسامحك ياتركي
( وشديته من ثوبي )
قولي كيف اسامحك انااعتبرتك اخوي ... اخوي ياتركي
ليه صدقت كلامهم ليـــ (وقاطعني)
_خلاص ياسالم ( ورفع راسه وكانت نظراته نفسها النظرات اللي كان يناظرني فيها اول ماشفته بالمدرسه) .. تكفى ياسالم خلاص
انااعترفلك اني اخطيت وجيتك واناعارف انك ماراح تغفرلي هالذنب لكني صديقك والشيطان اعماني ناصر لعب في عقلي ..
رميت تركي في الارض وطلعت وانا مسرع وركبت سيارت ابوي ومشيت وكان تركي يمشي وراي ويحاول يوقفني لكني ماعبرته ودق على جوالي ومارديت
كنت ناوي اروح للرس لاني اكيد راح القى ناصر بالاستراحه هناك في مدخل الرس وبالضبط في التقاطع الاول قطعت الاشاره وكان تركي وراي وفجاءه
سمعت صوت صدمه قويه ضربت الفرامل ونزلت وماتتوقعون وش هالمصيبه اللي الله امتحني فيها ..
اختلطت سيارت تركي بهيلوكس كانت مسرعه وماقدرت اميز بين زيت السيارات والدم اللي متناثر كان ابشع حادث شفته بحياتي وتخيلوا ان الحادث
لأعز انسان في حياتي
قربت من تركي اللي كان طايح على الارض وثوبه متقطع ولونه احمر ووجهه كله جروح وضربات كنت ارتجف ماقدرت اقف
طحت على ركبتي ورفعت راسه
#تركي تركي رد علي
( فتح تركي عيونه وتكلم بصعوبه وكأن فوق صدره جبل )
_ سالم سامحني
وبعدها غمض عيونه
كانو الشباب متجمعين علينا وكل واحد يصرخ
_ لاتحركه خله على الارض
_ ياناس نادو الاسعاف
لكني ماحسيت بغير تركي كان عندي امل انه بيعيش
شالو الاسعاف تركي للمستشفى العام وانا كنت وراهم بالسياره دخلوه غرفت العمليات وبعد نص ساعه طلع تركي .....!!!!
لكن للأسف ماكان يمشي على رجليه او يتكلم كان ........... ممد على سرير ومغطينه بشرشف ابيض ....
لا معقوله تركي مات كشفت الشرشف كانت اقول في خاطري اكيد يكذبون علي هذا راعي الهيلوكس تركي عايش انا تكلمت معه والله عايش ..
لكن الموت اخذه صرخت بصوت عالي وحست ان العالم كلهم يسمعوني ..
لااااا تركي لاتموت انتم كذابين ذبحتوا تركي اناتكلمت معه تركي مامااااات تركي ماماااااااااااات
ومسكت الدكتور اللي كان يدف السرير مع صدره
#ليه تذبح تركي تركي مامات ليه تذبحه .
ابعدوني الموجودين عن الدكتور ورحت حضنت تركي لاتروح ياتركي والله تعذبت بدونك لاتروح كنت حاضنه والدم ينزل بين اصابعي واصيح ..
جاء ابو تركي وفهد ومحمد ووليد اخوانه حاولو يبعدوني عنه لكني ماحسيت كان الحزن والالم ياكل قلبي ..
بعد صلاة الظهر اخذو تركي للمغسله وكفنوه وانا جالس عند المستشفى ماتحركت جاني فهد
_ سالم بعد صلاة العصر بندفن تركي ولازم تجي تودعه قبل لانحطه بين يدين ربه
رفعت راسي وكانت عيوني مليانه دموع
# يعني خلاص يافهد تركي مات
_ تعوذ من الشيطان ياسالم هذا قضاء الله
رجعت للبيت وبدلت ثوبي ورحت لمسجد الدهامي اللي كانو ا يصلون على الاموات فيه صليت العصر وطلعت للمقبره كنت شايل جنازة اعز مخلوق
عرفته تخيلو قمة الالم اللي اعيشه رايح اسلم اغلى انسان للتراب والدود نزلت للقبر انا وفهد ونزلنا تركل وفكيت العقد وكشفت وجهه - تركي سامحني
انا السبب انا اللي جبتك للموت سامحني ياتركي ونزلت دموعي
تمنيت ان الوقت يرجع واقوله اني مسامحك واخليه يرتاح لكن ؟؟؟؟؟
طلعنا من القبر ودفناه وراحوا كل الموجودين في المقبره وانا جلست عند قبر تركي ..
كنت اتذكر كل شي صار من عرفته ..
_سالم لو تموت تصيح اولا
# اكيد لا انا رجال ودمعتي ماتنزل
_ حتى انا ماراح اصيح لو تموت بس بيضيق صدري
# اصلا اذاكبرت وشريت سياره ماراح اسرع على شان مااصدم وتخرب سيارتي
_لايالغبي انا إذا كبرت ماراح اسرع على شان مااموت
كانت هالذكريات تمر قدام عيني وكأنها صارت امس
آآآه ياتركي ياليتي سامحتك كان ماصار اللي صار
يمكن تقولون ان الموضوع مايستاهل
هالزعل لكن الاخلاص والوفاء الصادق بين الاصدقاء قلب مايجرحه غير الشك
قطع ذكرياتي صوت شاب كان يبكي بكاء جزع قمت على شان اهديه ويوم قربت منه تفاجأة انه فهد صديق ناصر كان يصيح وما انتبه اني واقف جبنه
#فهد .. فهد ..
التفت وبعدماشافني وقف ومسح دموعه
_ عظم الله اجرك ياسالم الله يصبرك على فراق تركي
# جزاك الله خير والله يصبرك على فراق ...... -
ماكنت اعرف مين اللي مايت من قرابة فهد كنت متوقع ابوه لانه كبيرو تعبان لكنه قاطعني وقال بصوت حزين
_يصبرني على فراق صديقي ناصر
# لامستحيل
اصدق معقوله ناصر وتركي في يوم واحد
_وشفيك ياسالم اسكت شكلك مادريت اللي صدم تركي امس ناصر
ومشيت وتركت فهد وانا منصدم من اللي صار
معقوله جيت على شان اذبح ناصر ويصدم تركي انا غبي انا **** انا حقير لييييييييييييييه..
طلعت من المقبره وركبت سيارتي و كنت امشي 20 وكلي حزن على فراق تركي وكنت افكر كيف اعيش بعده انامااقدر اتصرف بدونه وشلون .... وقطع اسإلتي
ولدين بعمر الــ 9 سنين يمشون في الشارع وكل واحد معاه بيبسي وواحد يقول للثاني
_لو اللحين يجي ارهابي ويخطفني تنقذني
ضرب الثاني صدره وقال
-افاعلي انا ثويلم ولد (فلان) والله للعنهم
قاله الثاني
_كفوا يالغالي قده وقدود
وقفت السياره ونزلت ..
#السلام عليكم
- كلهم - وعليكم السلام
# وش اسمك
-اناثالم وهذا ناصر صديقي وولد جيراننا
# والنعم والله حتى انااسمي سالم ياناصر انت تحب سالم
-ايه احبه حتى اكثر من جاسم اخوي
# وانت ياسالم تحب تركي
(اخطيت في الاسم لاني تعودت على اسمي معه) اقصد ناصر
- ايه ناثر صديقي ودايم يفزع معي ..
ركبت السياره وجلست الدور في الشوارع ماابي ادخل البيت وكل شي فيه يذكرني بتركي لكن امي وابوي ازعجوني وهم يدقون علي كانوا
خايفين يصيرلي شي رجعت للبيت ودخلت للمجلس وكانت ريحة الغالي وغترته اللي طاحت من خناقي الى الحين فيه جلست واخذت الغتره وشميتها ومسحت
فيها الدموع اللي نزلت من عيني
#هذا اللي بقالي منك يالغالي وينك الحين محتاجلك ثويلم محتاجلك كثييير
سلمت على امي وابوي
اللي كلهم عزوني بوفات تركي ورقي لغرفتي لقيت ثوبي اللي كان كله دم تركي شلت الثوب بين يديني والدموعي تطيح عليه وتذكرتاخر كلام تركي امس
(ايه ياسالم ...... اناللي علمتك واناللي علمتك بعد ماتصدق كلام الناس لكني اسف سامحني )
ياتركي جفت دمعت العين لرضاك
واليوم طاحت فوق غترتك وثوبي ...
نصيحه لكل صديقين ..
اجعل ثقتك بمن تحب كالجبل تهزها الزلازل لتزيد من ثباتها ..
واغفر لمن اعتذر فإن العمر يمضي ونهايته الموت .........
ارجوا منكم الدعاء لتركي بالمغفره ....


انتهت ...


__________________
(منقوووووووووول )


والله تقطع قلبي على تركي وسالم


لاتنسوني بالردود
الرجوع الى أعلى الصفحة اذهب الى الأسفل
احمد
امبراطور المنتدى
امبراطور المنتدى
avatar

عدد المساهمات : 915
تاريخ التسجيل : 11/05/2009
العمر : 37
الموقع : كرسي القيادة

مُساهمةموضوع: رد: ياتركي جفت دمعت العين لرضاك . لاتفوتكم   الجمعة ديسمبر 18, 2009 8:15 am

شكرا لكي اخت احلام بنوتة على المواضيع الرائعة

وشكرا لتواجدك المستمر

_________________
عظَمة عقلك تخلق لك الحساد .. وعظَمة قلبك تخلق لك الأصدقاء
.........................................................................
الرجوع الى أعلى الصفحة اذهب الى الأسفل
http://bmw2030.yoo7.com
 
ياتركي جفت دمعت العين لرضاك . لاتفوتكم
الرجوع الى أعلى الصفحة 
صفحة 1 من اصل 1

صلاحيات هذا المنتدى:لاتستطيع الرد على المواضيع في هذا المنتدى
منتدى الأشــــــــــــــراف :: المنتدى العـــــــــــــــــــــــــــــــام والمفتوح :: قسم القصة القصيرة-
انتقل الى: